Merror + Fud + EB = Layf

Hindi na siguro makukumpleto ang tanghalian ng isang Pilipino, kung di siya nakakapanood ng isang variety show.  Sa Pilipinas lamang tumatagal ang isang variety show na halos bumibilang pa ng 25 pataas na taon sa ere. 

Masarap nga namang kumain na habang nabubusog ka na, ay pansamantala ka pang nakalilimot sa iyong mga problema dulot ng isang programang nakadudulot ng isang masarap na ngiti sa iyong mga labi.

Minsan, napatigil ako sa isang carinderya, natural may mga ulam, may kanin, at may telebisyon. Pero nagtanung ako sa sarili ko nang may makita akong isang salamin sa loob. 

may barberya din ba sa loob?

Ewan

E bat may malaking salamin?

Para siguro makita kung gaano kalaki ang subo 

**tawanan

Siguro nga  

Pero bat ganyan kalaki? Parang pang parlor.

E siguro ay may sideline yung karinderya sa tanghali, sa gabi, parlor. ganun lang. Simple lang diba?

Huh? weird.

Nagtataka lang ako dahil sa halos lahat ng karinderya na naraanan namin ay may mga malalaking salamin sa loob.

Nagnilay. Ngumiti.

Siguro nga, kailangan ang salamin. Dahil ang Buhay ay isang variety show.

Sa Variety show, masaya ang buhay. parang walang lugar ang pagmumukmok. Parang buhay mo. parang buhay ko. Na sa Araw araw ay kailangan mong isuot ang ID mo, este ang isang masayang ngiti. Dapat daw nakangiti palagi, para swertehin sa buhay, para manalo sa LAban o Bawi o sa On the Spot Jackpot. 

Sa Variety Show, hindi mo alam kung ano ang ilalabas ng mga roleta. di mo alam kung anung swerte o kamalasan ang ilalabas ng mga araw mo. Minsan maganda, pero sa isang mahirap, swerte na kung may matanggap kang limang daang piso pauwe.

Sa Variety Show, walang puwang ang antok. Dahil kapag inantok ka sa buhay, wala kang mapapala. kahit mga kangkong sa sapa e di ka uubra. bawal maging tamad, bawal antukin.

Sa Variety Show, maraming tanung na dapat sagutin para manalo, para magkaroon ng direksyon ang buhay mo kailangan mong sumagot sa mga tanong na magdidikta ng paroroonan mo. kung tataktak ka ba o tatakbo.

Sa Variety Show, may baon ka dapat na talino, kung hinde baka english lang ng yungib ay di mo pa alam. kahit kapirasong talino dapat mayroon ka, dahil baka di mo na namalayan na laslas na pala ang bag mo, wala ka na ngang cellphone, wala ka nang pera.. kumalat pa sa kalsada ang make up kit at mga gamit na laman ng bag mo.

Sa Variety Show dapat may sponsor ka ren. kailangang magpatalastas. mambola ng manonood. kailangang ita tak sa isip ng nakasalubong mo na ang sabong A ay mas magaling kaysa kay sabong B.

kailangang bolahin ang tao na ang pananaw ko ay tama at mali naman ang sa iyo dahil ang pananaw mo ay mali.

Na kailangang araw araw ay mapaniwala mo na ikaw si superman at kaya mong baliktarin ang ikot ng elektric fan.

Sa Variety show, meron ding drama. gaya ng buhay mong puno ng kadramahan. Na pwede nang ipantay sa dramathon sa Hapon.

Sa Variety Show ang tangi mo lamang anting anting ay ang lakas ng loob at gabay ng Poong Maykapal upang manalo at mag uwi ng limpak limpak na papremyo at salapi. Isang supot at isang sakong Lakas ng Loob at Siyempre ang walang kapantay na paggabay ng MAykapal upang mapagtagumpayan mo ang malalaking hamon ng Variety Show ng iyong Buhay.

Nalaman ko na kung bakit may salamin, kung bakit may telebisyon, may kanin at ulam, at isang variety Show.

Na sa tuwing isusubo mo ang pagkain na buhay ng iyong katawan ay malalaman mong Aba! Variety Show ang palabas sa Salamin.